مسا الورد🌺
#للحوامل
ولادة طبيعية والا قيصرية؟
للأسف شفت كتير بوستات صبية حامل بتكون عم تستشير البنات اذا تولد طبيعي او قيصرية..
وكتير بينصحوها للأسف بالقيصرية وأنها أريح وحتى بنات لسا بكريّات مقررين يعملوا أو عملوا قيصرية على قولة انا ما بتحمل وجع الطلق..
أول شي يا حبيباتي بالأمور الطبّية المفروض نسأل الاطباء أفضل وأأمن لانه كل واحد بتكون حالته وتجربته مختلفة ومو مقياس ومابتتعمّم
صحيح بعض الولادات الطبيعية بتتعقد وبتكون صعبة لكن نسبة هالشي انه يصير اقل بكتييير من نسبة تعقيدات القيصرية
اوك حلو الواحد ياخد خبرة وتجارب من غيره بس مو بالأمور الكبيرة
تاني شي الموضوع مفروض ما يكون فيه خيار ومو قرارك انت، المفروض يقرره طبيب النسائية حسب وضعك ووضع الجنين
🌺 طيب ليش لا القيصريّة كاختيار؟
🔹 يا بنات القيصرية قبل كلشي جراحة، وأي عمل جراحي اله مخاطر وتداعيات عالجسم وتغيير بطبيعته الربّانية و المريض والطبيب بفضّل يجرب كل الوسائل الأخرى قبل الجراحة ليش؟
لانو الجراحة بتعرض الجسم لجهد كبير وتغير كبير
وجراحة القيصرية اولا الجرح بكون عميق عدة طبقات بالبطن وبسبب ندبة مدى الحياة بالرحم بتمنع المرأة انها تولد طبيعي بالمرات القادمة بفترات اقل من سنتين ونص او ٣ سنوات لانو الرحم بما انه فيه ندبة ما بيتحمل الانقباضات القوية تبع الطلق والا ممكن يرجع يفتح الجرح أو لا سمح الله يصير تمزّق بالرحم. يعني بالمختصر بتكوني حكمتي على حالك غالباً بالجراحات المتكررة كل ما حبيتي تحبلي اذا مو بفرق كبير.
🌺طيب شو مخاطر القيصريات المتكررة وخاصة أكتر من ثلاث قيصريّات؟
طبعاً مو شرط تصير مع الكل ولا هدفي من حكيي خوّف اللي مضطرة عالقيصرية لكن وجب أحكي المخاطر للتوعية للي بتختارها اختيار.
🔹خطر الاصابة بالتصاقات بالرحم والمثانة والأمعاء وأحياناً انسداد الأمعاء
🔹زيادة احتمال الاصابة بداء بطانة الرحم الهاجرة وهوه مرض مؤلم عبارة عن نمو نسيج شبيه ببطانة الرحم خارج الرحم وقد يسبب نزيف ومشاكل أخرى
🔹زيادة خطورة الإصابة بنزيف بعد العملية قد تحتاج بسببه المريضة الى نقل دم أو استئصال للرحم لا سمح الله.
🔹زيادة نسبة حدوث مشاكل بالمشيمة مثل المشيمة المنزاحة او المشيمة الملتصقة.
🌺 طيب كيف بقولوا القيصرية أريح وأسهل ومتل "شربة المي"؟
🔹 صدقيني اللي بتقلك القيصرية أريح غلطانة لانو حالات نادرة انو الوحدة ترتاح بعدها، اوك وقت الولادة مافي تعب بس بعد الولادة اقل شي في ٣ شهور تعب وممنوع الرياضة القوية والجهد هادا غير الم الجرح المبرح عالاقل شهر عالمسكّنات ( في ناس ما بتتألم كل هالشي بس الغالب بتتألم فترة طويلة) ، اسالي اللي جربوا الطبيعي والقيصري سوا وشوفي شو بيقلولك من بعد ما جربوا التنتين ، او اسالي اللي ولدت ٣ قيصريات او اكتر عن وجع الجرح المزمن...
🌺خايفة من وجع الطلق؟
🔹 طيب كيف ولدونا أمهاتنا وجداتنا والحمدلله الطب والعلم اتطور وصار في طرق للتنفس كتييير بتساعد عتخفيف الالم وصار في اختراع إبرة الظهر اللي ما بتخليكي تحسي الا بألم خفيف متل الم الدورة او اخف ومتل ما بقولوا وجع ساعة ولا كل ساعة عالأقل بعد ما تفرحي بالبيبي وتضميه عصدرك خلص بيخلص عذابك بينما بعد العملية بالعكس ببلش التعب خاصةً اذا مافي حدا يقوم فيكي وهاد حال أغلبنا بالغربة..
🌺 وللتنويه بس المنطقة الحساسة لا بتتشوه ولا بتخرب بيعملولك قطب تجميلية وبيرجع جسمك تمام وفيكي تعملي تمارين كيجل لتقوية عضلات الحوض بعد الولادة، واللي صار معها ترهل او شي او هبوط رحم او فتاق فهي حالات جدّاً نادرة.
🌺فختاماً و برجع بقول مو هدفي التخويف
بس هدفي التوعية ونشر العلم والنصح لوجه الله لانو للأسف صايرة القيصريّة موضة..
آخر الكلام..
اذا ماعندك مشاكل وحالات خاصة بتستدعي الولادة القيصرية...اولدي طبيعي
ويفترض بشكل عام الطبيب اللي صاحب ذمة يرفض يعملك قيصرية الا عند الضرورة. ( بأوروبا ما بيلجأوا للقيصرية الا بحالات معيّنة وبضلوا بحاولوا يشجعوا الأم عالطبيعي)
ربّي يقومكن بالسلامة كل الحوامل يارب ويطعم كل مشتهي 🌺
اللهم بلّغت اللهم فاشهد
#الطبيبة_هبة_النايف